හීන මන්දාකිණිය..........

ඔන්ලයින් ප්‍රේමය

අකුරු හතරක් වචනයක් වී හදවතේ ගැඹුරැම තැන ස්පර්ශ වී නම් එය "ආදරය"යි. ලොකු , කුඩා , බාල , මහලු කොයි කාගේත් පුද්ගල සන්තානගත චෛතසිකයන් තුළ මුකුලිත වන ප්‍රේමය හරි පුදුමාකාරය. එය හරි සුන්දරය . ආදරයකට පුද්ගලයෙකු ජීවත් කරවීමටත් ඔහුව මිය යෑමටත් අමුතු අද්විතීය බලයක් ඇත.

මෙවන් වූ ආදරය වර්තමාන පෙම්වතුන් හැඳින සිටින්නේ ද යන්න මා හට පැනයකි. ගෝලීයකරණය හා බැදි වාණිජමය ලෝකයක මුදල් පසුපස හඹා යමින් වර්තමාන මිනිසා "ප්‍රේමය " සොයයි. එහෙත් ඔහුට සැබෑ ප්‍රේමය හමුවේද? ඔහු හති වැටෙනවා මිසක ඔහුට හිමිවන යමක් ඇතිද?

අතීතයේ පෙම්වතුන් ආදරය කළ අයුරු හරිම සුන්දරය. සඳ පායා එන ගොම්මන් වේලාවට සුවඳ කොළ ගෙන , ඈත අහස දෙස බලමින් , තෙලිතුඩින් තම සුපෙම්වතියට නිදහසේ සිතට ගලා එන දේ ලීවේය. නැතිනම් කවියට නැගුවේය. එය පසුදා උදෑසන පොත් පිටු අතර සඟවාගෙන ගොස් සුපෙම්වතාට , සුපෙම්වතියට දෙන ලදී. මෙය හොර රහසේ සිදු වුවද හදවතේ ගැඹුරුම තැන ස්පර්ශ කළ ආදරය විය.

නමුදු අද වන විට පෙම් කවි කුරුල්ලන් එෆ්.බී. කුරුල්ලන් බවට පත් වී ඇත. සැදෑ කළුවර දෙස බලමින් කවි මුමුණන , ලියවෙන වෙනුවට සිංග්ලීෂ් වර්ඩ් වලින් එස්.එම්.එස්. රජ කරයි. මේ අරුමය කිමෙක්ද?

දම්මි - සුගත්ගේ , දෙවෙන්දොරා - නොරිකා සංගේ ආදරය අද වියැකී ගොස්ය. ඒ වෙනුවට

" ඩේටා වලින් හුස්ම ගන්න

   බැටරියෙන් හදවත ගැහෙන

   සයිබර් ලෝකෙක

   දහසක් වුන් පිරිවරා

    තනිවුව ජීවිත අතර

   ඔන්ලයින් ප්‍රේමය රජ වී ඇත."

 ඉස්සර සිතින් සිත යාවුණු ඒ ආදරය , ප්‍රේම වෘත්තාන්ත අද "ඔන්ලයින් ප්‍රේමය " වී අවසන , කාමරයක සුණු විසුණු වී යයි. අප පැතූ අප සෙවූ සැබෑ ආදරය මෙය වේ ද?  ගතින් නොබැදුණ ද සිතින් බැදුන ආදරය සැබෑ ප්‍රේමය නොවේ ද? එසේ වී නම් හපොයි! අද රටට වී ඇති හදිය කුමක් ද?

" හායි ස්වීට් හවු ආ යූ " යන පොෂ් වචන , පොර ටෝකින් සහ සයිෆයි ලුක් එක එස්.එම්.එස්.එහෙන් මෙහෙටත් මෙහෙන් එහෙටත් ක්ෂණිකව හුවමාරු වේ. පෙම්වතා පෙම්වතිය කාගේ කවුරු වුවද , ඔවුන් නොදැකපු අය වුවද කම් නැත. ඔවුනොවුන් ඔන්ලයින් ඔවුනොවුන්ගේ ලයිෆ් එකම වී හමාරය. ප්‍රේමය අන්ධ වී පෙම්වතා හෝ පෙම්වතිය සමඟ මාලය උකසට තබා ජීවිතය බෙදා ගන්නට තරම් වර්තමාන ප්‍රේම කුරුල්ලන් අසරණ වී ද , මෝඩ වී ද, නැතිනම් උන්මන්තකයින් වේ ද, යන්න සිතීම බැරෑරුම් ප්‍රශ්නයකි. මෙවැනි කරුණු කාරණා අපට නිරන්තරයෙන් ජන මාධ්‍ය හා සමාජ මාධය හරහා අසන්නට දකින්නට ලැබීම සාමාන්‍යකරණය වී ඇත. විටෙක මෙම ඔන්ලයින් ප්‍රේමය වර්තමාන තරැණ තරැණියන්ට ජීවන ජීවිතයේ අවසානය පවා අභාග්‍ය ලෙස උදාකර දෙන්නේය.

එදා සුවඳ පිටු අතර සෙමින් ලියා , හොර රහසේ සුවඳ හසුන මහමෙරක් විය. එය විටෙක සතුටු කදුළු හෝ දුක් කදුළු පිරි කොටුපොළක් විය. නමුද් දුන් මෙය වර්තමාන තරැණ තරැණියන්ට හාස්‍යය උත්පාදන කාරණයකි. එදා පොත්වල පිටු අතරින් සුවඳ හසුන් මාරැ වූ අතර අද පොත්වල පිටු අතරින් දුරකථය රදවා එස්.එම්.එස්. යවන කාලයක් උදා වී ඇත. කාලය අරැමය. නමුදු එය කරැමය ද යන්න මම නොදනිමි.

"නොට් ජෝර්නින්

බට් ෆීලිංග්

වයි ඩාර්ලින් නොට් ලීවිං

සො හොට් බඩී ලවු යූ මගේ මැණික "

 යන  ආදර හැඟුම් දුරකථනයේ එස්.එම්.එස්. අතර උඩු දුවයි. බොහෝවිට මේ ආදර හැඟුම් මුමුණනුයේ කෙදිනකවත් ජීවිතයට නොදැකපු පෙම්වතුන් ය. නමුත් හසුන් අතර රැදි ආදරය මෙන් නොව නොදැකත් ළගින්ම දැනෙන ලෙස චැට් කරයි. සතියකින් , දෙකකින් ඔවුන් මුණ ගැසෙයි. ඉන්පසු ඔන්ලයින් මුකුලිත වූ ආදරේ කාමරයක මිලින වී යයි. ඉන්පසු ඔවුනොවුන් සොයා ගැනීමට පවා නොහැකිවේ.

අතීතයේ වෙරළ ඉමේ . වෙල් යායේ , වැට අද්දර , දොළ අද්දර හෝ වැව් ඉස්මත්තේ හිඳ දෑත් දෙනෙත් පටලා මිමිණු ආදරය , නැතිනම් සුන්දර පාසල්  පෙම අද කායි ද? අද ඒවා මියැදී ගොස් ද? ඒ වෙනුවට ඔන්ලයින් ප්‍රේමය ආක්‍රමණය කර ඇත්ද?

"නොදැකත් ළඟින් චැට් කරන නිසා

ඉස්සර පෙම්වතුන් දැන් ඔන්ලයින් වෙලා……………………"